Sýningar á sjónvarpsþáttaröðinni The Crown, sem fjallar um Elísabetu II Englandsdrottningu, hefjast á Netflix í nóvember. Þáttaröðin er sú dýrasta sem Netflix hefur framleitt til þessa. Þættirnir eru tíu og hver um sig er klukkutíma langur. Hugmyndin er að gera alls sextíu þætti um líf drottningar frá því hún gekk í hjónaband til dagsins í dag. Handritshöfundur er Peter Morgan sem gerði handritið að The Queen þar sem Helen Mirren lék drottninguna og hreppti Óskarsverðlaun fyrir frammistöðu sína.

Breska leikkonan Claire Foy leikur Elísabetu á fyrri hluta valdatíðar hennar. Foy lék titilhlutverkið í sjónvarpsþáttunum Little Dorrit sem gerðir voru eftir skáldsögu Charles Dickens og fór með hlutverk Önnu Boleyn í verðlaunaþáttunum Wolf Hall. Matt Smith, sem leikið hefur Doctor Who, er Filippus prins. John Lithgow er í hlutverki Winston Churchill sem var mikill aðdáandi drottningar, Jared Harris leikur Georg VI, Victoria Harris leikur Elísabetu drottningarmóður, Vanessa Kirby er hin ódæla Margrét, systir drottningar, og Eileen Atkins leikur Mary drottningu.

Sýninga er beðið með mikilli óþreyju en frést hefur að breska konungsfjölskyldan sé nokkuð óróleg vegna þáttaraðarinnar og óttist að þar sé ekki fjallað um drottninguna og fjölskyldu hennar af nægilegri virðingu.