Óskar Guðmundsson hlaut Blóðdropann, íslensku glæpasagnaverðlaunin, fyrir Hilmu
Óskar Guðmundsson hlaut í gær íslensku glæpasagnaverðlaunin, Blóðdropann, fyrir bókina Hilma sem kom út í fyrra hjá Draumsýn. Bókin verður því framlag Íslands til Glerlykilsins, norrænu glæpasagnaverðlaunanna. Tíu bækur áttu möguleika á að hljóta verðlaunin í ár, meðal annars bækur eftir Arnald Indriðason, Yrsu Sigurðardóttur og Stefán Mána, sem hefur hlotið verðlaunin tvö síðustu ár.
Í rökstuðningi dómnefndarinnar sagði meðal annars um verðlaunabókina: „ Spennan hefst á fyrstu blaðsíðu sögunnar og lesandinn fylgist með óhugnanlegum atburði úr fortíð. Atburði sem teygir sig inn í nútíð og brátt fjölgar morðum og ofbeldi eykst. Lögreglukonan Hilma þarf ekki aðeins að kljást við að finna morðingja heldur þarf hún einnig að glíma við forhertan glæpamann úr undirheimum Reykjavíkur sem vill koma fram við hana hefndum. En Hilma er hörku nagli sem lætur engan vaða yfir sig.“
Í dómnefnd Blóðdropans í ár sátu Úlfar Snær Arnarson, Kristján Jóhann Jónsson og Guðrún Ögmundsdóttir.