Elmar Gilbertsson fer með stórt hlutverk í óperunni Évgení Onegin – Óperan er sungin á rússnesku
Elmar Gilbertsson fer með hlutverk Vladimirs Lenskí í óperunni Évgení Onegin eftir Pjotr Tchaikovsky sem frumsýnd verður í Hörpu laugardaginn 22. október. Fyrr á þessu ári söng Elmar í Hörpu hlutverk Don Ottavio í Don Giovanni.
Elmar er spurður um hlutverk Lenskí og segir: „Oft eru andstæður í óperum. Í Don Giovanni var teflt saman sem andstæðum hinum hjartahreina og heiðarlega Don Ottavio og flagaranum Don Giovanni. Hér er svipað á ferð, aðalsmaðurinn Onegin er skúrkurinn og hinn lægra setti Lenskí er andstæða hans. Lenskí er ungur rómantískur maður og skáld sem þekkir ekki þann heim sem Onegin lifir í. Lenskí er trúlofaður Olgu, en hún er systir Tatjönu sem elskar Onegin. Eftir að Onegin daðrar við Olgu verður einvígi milli þeirra tveggja.“
Elmar segir hlutverk Lenskí vera draumhlutverk fyrir sig. „Ég hef beðið lengi eftir að syngja þetta hlutverk sem hefur allt til að bera. Í söngnámi mínu byrjaði ég mjög snemma að syngja aríu Lenskí, Kuda, kuda, og þá vissi ég að ég ætti eftir að syngja þetta hlutverk, það væri bara spurning hvenær.
Þetta er gott, lýrískt tenórhlutverk sem allir vilja syngja. Ég finn mig vel í því og það er hægt að gera svo mikið við það. Ég veit ekki hvort það er tilviljun eða viljandi gert að Lenski fær að syngja allar fallegustu línurnar í þessari óperu.
Þetta er líka draumahlutverk að því leyti að karakterinn er mjög áhugaverður. Lenskí er ástfanginn upp fyrir haus og síðan daðrar Onegin við unnustu hans og hann verður afbrýðisamur og reiður og skorar þennan andstæðing sinn á hólm. Það er hægt að gera svo margt við þetta hlutverk og það býður upp á ýmiss konar túlkun. Afbrýðisemi Lenskí má til dæmis þróa þannig að hún stigmagnist en gjósi ekki bara upp allt í einu.“
Það vekur athygli að óperan er flutt á rússnesku, en íslenskum og enskum þýðingum er varpað á skjá. „Það hefur verið ögrandi að vinna þetta hlutverk, sérstaklega vegna rússneskunnar sem er ekki auðveld,“ segir Elmar. „Maður þarf alltaf að vita upp á hár um hvað maður er að syngja. Auðvitað síast það smám saman inn en maður stendur sig að því að þurfa að fletta upp orðum. Svo hef ég setið sveittur við að ná framburðinum með aðstoð þjálfara. Sem dæmi má nefna að það eru átta mismunandi s-hljóð í rússnesku þannig að þetta er glíma. Maður er búinn að syngja í gegnum hlutverkið oft og mörgum sinnum og gerir alltaf sömu vitleysuna. Það er ekki fyrr en maður er búinn að gera vitleysuna sem maður áttar sig á mistökum sínum. En maður er á réttri leið þegar maður uppgötvar það sjálfur.“
Tónlist Tchaikovsky hefur glatt kynslóðir, jafnt þessi ópera hans sem önnur tónlist. Elmar er spurður um skoðun sína á tónskáldinu. „Hann nær að gæða sögur ótrúlegu lífi, eins og í þessari frægustu óperu sinni og svo er öll hin tónlistin, ballettarnir og hljómsveitarverkin. Það er eitt orð yfir Tchaikovsky: Snillingur. Svona snillingar eru yfirleitt erfiðir og sjálfur var hann mjög flókinn persónuleiki.“
Elmar, sem er búsettur í Hollandi, hefur sungið í óperusölum víða um heim. Hann er spurður hvernig sé að syngja í Hörpu. „Það er dásamlegt að syngja í þessum sal sem er fyllilega samanburðarhæfur við bestu tónleikasali úti í heimi.“
Fjölmörg verkefni bíða Elmars eftir sýningar á Évgení Onegin og þar má nefna hlutverk í Brottnáminu úr kvennabúrinu eftir Mozart í Toulon, Rínargullinu eftir Wagner í Hamborg og Krýningu Poppeu eftir Monteverdi í Nantes.
