„Ég vissi að það væri eitthvað bogið við hann en ég gat ekki fest fingur á það,“ segir Holly Eudy, fyrrverandi kærasta bandaríska raðmorðingjans Todd Kohlepp. Holly ræðir samband sitt við Todd í viðtali við Inside Edition en þar segist Holly ekki hafa haft hugmynd um skuggalegar hliðar hans.
Todd var fyrr á þessu ári dæmdur í sjöfalt lífstíðarfangelsi eftir að hafa játað á sig sjö morð. Morðin framdi hann á þrettán ára tímabili í Suður-Karólínu, en hann var handtekinn í fyrrahaust eftir að kona fannst hlekkjuð í geymsluskúr á landareign hans.
Fyrst myrti hann fjóra starfsmenn vélhjólaverslunar árið 2003, síðan myrti hann ung hjón árið 2015 sem unnu fyrir hann og loks myrti hann 32 ára karlmann í ágúst í fyrra. Það var kærasti konunnar sem fannst hlekkjuð á landareign hans.
Í viðtalinu við Inside Edition segir Holly að hún hafi verið kærasta Todds í tíu ár. „Hann veitti mér mikla athygli og lét mér líða eins og ég væri mikilvæg,“ segir hún. Hún segir einnig í viðtalinu að hún velti fyrir sér hvort hún hefði orðið næsta fórnarlamb hans, án þess þó að fara dýpra ofan í þann grun sinn.
Todd hafði áður komist í kast við lögin en árið 1986 rændi hann fjórtán ára stúlku í borginni Tempe í Arizona. Todd ógnaði henni með skotvopni, ók með hana heim til sín þar sem hann nauðgaði henni. Hann skutlaði stúlkunni svo heim til sín og hótaði að drepa hana ef hún segði frá. Lögreglan hafði hendur í hári Todds eftir árásina og var hann dæmdur í fimmtán ára fangelsi. Árið 2001 var honum sleppt úr fangelsi og fluttist hann þá til Suður-Karólínu þar sem morðin voru framin.