Sóli og Viktoría hafa verið saman síðan árið 2016 en þau fóru á dögunum í frí til Parísar sem átti eftir að taka óvænta stefnu líkt og Sóli greinir frá í færslu sinni. Þar birtir hann jafnframt meðfylgjandi mynd og eins og sjá má leynir ástin sér ekki hjá parinu.
„Þessi Parísarferð er búin að vera dásamleg en henni átti að ljúka í gær. Eitthvað voru örlögin á móti því þar sem við tókum ranga rútu á flugvöllinn og enduðum í Beauvais og misstum af fluginu okkar heim. Sennilega var þetta bara ábending um að við gætum ekki farið heim ótrúlofuð,“
ritar Sóli en bætir síðan við að vísu sé hann ekki búinn að biðja tengdaföður sinn um leyfi til að biðja um hönd Viktoríu. Viktoría hafi að engu að síður sagt já og bindur parið vonir við að komast heim í kvöld.
DV óskar turtildúfunum innilega til hamingju með áfangann.
