„Við vonumst til þess að Jo nái fljótum bata til að tónleikaferðin geti haldið áfram. Jo varð fyrir miklum vonbrigðum með því að þurfa að fresta tónleikunum“ sagði Lisbeth Wiberg Olsen, umboðsmaður, í samtali við Telemarkavisa eftir að tónleikum hljómsveitarinnar á Skien Live hátíðinni var aflýst.
„Við biðjumst innilegrar velvirðingar, en vegna veikinda sem báru brátt að, þurfti Jo Nesbø að leggjast inn á spítala og öllum tónleikum sem skipulagðir voru um helgina hefur verið aflýst.”
Ekki er vitað hvaða veikindi krimmakóngurinn berst við en samkvæmt norska ríkisútvarpinu þá er hann á batavegi eftir að hafa fengið rétta lyfjagjöf.
Jo Nesbø er 58 ára gamall og hefur getið sér gott orð fyrir glæpsögurnar um Harry Hole og fleiri. Hann hefur einnig gefið út fjölda barnabóka, til dæmis um Doktor Proktor. Bækur hans hafa verið þýddar á fjörutíu tungumál og selst í um fjörutíu milljón eintökum. Hann hefur einnig starfað sem blaðamaður, hagfræðingur og spilaði knattspyrnu með úrvalsdeildarliðinu Molde FK á yngri árum.
