Lögreglan á Norðurlandi eystra segir að borið hafi á því á síðustu dögum að fólk hafi fengið símtöl erlendis frá. Viðkomandi kynnir sig sem starfsmann Microsoft og segist hann þurfa að gera við öryggisgalla í Windows-stýrikerfinu.

„Þeir ætlast til þess að fólk fari í tölvu sína og geri þar ákveðna hluti samkvæmt fyrirmælum þeirra. Þarna eru svik í tafli þar sem markmiðið er að utanaðkomandi nái stjórn á tölvunni, oft í glæpsamlegum tilgangi. Þeir sem lenda í þessu eru beðnir um að leggja sem fyrst á og hlýða engu af því sem lagt er fyrir þá að gera. Það skal áréttað Microsoft-fyrirtækið notar aldrei þá aðferð að hringja í fólk til að tilkynna og gera við öryggisgalla.“