Sigurður G. Tómasson, fyrrverandi dagskrárstjóri Rásar 2 sem lengi var virtur fjölmiðlamaður, blandar sér með mjög ákveðnum hætti inn í umræður um ásakanir á hendur Jóni Baldvin Hannibalssyni um kynferðislegt ofbeldi og kynferðislega áreitni.
Sigurður gagnrýnir harðlega stofnun bloggsíðu með nafnlausum sögum um framferði Jóns Baldvins, sem og ásakanir um að Jón Baldvin hafi látið nauðungarvista Aldísi dóttur sína á geðdeild til að þagga niður í henni. Sigurður G. skrifar nokkrar færslur á Facebook um málið sem sumar hafa vakið miklar umræður. Fyrsta stöðufærsla Sigurðar um málið er eftirfarandi:
„Nú er búið að opna aðgang að síðu með ásökunum á hendur Jóni Baldvini Hannibalssyni. Hef ekki skoðað þessa síðu en ásakanir ku vera nafnlausar. Því er ómögulegt að meta þær af viti. Í ásökunum á hendur Jóni ægir saman ásökunum um ósæmilega hegðun, dónaskap gegn konum, ofbeldi gegn konum og barnaníð. Í þetta er svo blandað röngum frásögnum um nauðungarvistun og eðli geðhvarfasýki. Ein ákærenda líkti Jóni Baldvin við Jimmy Saville en hann níddist á hundruðum barna. Ég get ekki með neinu móti lagt mat á sannleiksgildi frásagnanna. En þvættingurinn um geðhvarfasýkina og bein ósannindi um nauðungarvistun auk þessara mismunandi frásagna og ásakana eykur ekki á trúverðugleika.“
Í umræðum undir færslunni bendir sumir á að margar ásakanir hafi komið fram á Jón Baldvin undir nafni, einnig sé auðvelt að tengja frásagnir á bloggsíðunni metoo-jonbaldvin við höfunda þeirra. Svala Jónsdóttir svarar færslu Sigurðar með þessu orðum:
„Það er sorglegt að fólk skuli hafa geð í sér til að verja ofbeldismenn.“
Sigurður G. áréttar þá að ásakanir sem bornar eru fram á Jón Baldvin nafnlausar hafi ekki sömu vigt og þær sem bornar eru fram undir nafni. Tal um nauðungarvistun Aldísar sé síðan þvættingur. Hinn virti prófessor, Eiríkur Rögnvaldsson, sem kenndi málvísindi og íslensku í 37 ár við Háskóla Íslands er harðorður í garð Sigurðar. Eiríkur segir:
„Það er nú mjög auðvelt fyrir þá sem vilja að setja nafn á margar þessara sagna. Margar kvennanna hafa þegar komið fram undir nafni. Í öðrum tilvikum fylgja upplýsingar sem duga til að finna sögumann.“
Sigurður G. Tómasson er síðan sakaður um að fjalla á vafasaman hátt um meint veikindi Aldísar. Það skal einnig áréttað að Aldís hefur birt tvær umsagnir frá læknum sem segja að hún beri engin merki þess að eiga við geðræn veikindi að stríða. Sigurður gengur svo enn lengra og sakar hana um ofbeldisverk:
Eiríkur svarar Sigurði:
„Hvers konar foreldri talar um barn sitt eins og JBH hefur gert?“ og bætir síðan við: „Það er undarlegt að horfa upp á mann tala dóttur sína sífellt niður til að bjarga sjálfum sér. Það er a.m.k. ekki til þess fallið að bæta geðheilsu hennar.“
Þá segir kona að nafni Bylgja að málflutningur Jóns Baldvins sé trúverðugri en allra þeirra kvenna sem hafa stigið fram. Það innlegg kunni Sigurðar G. að meta og líkaði við það.
Þá er Sigurður G. Tómasson sakaður um að ganga enn lengra en Jón Baldvin í að reyna að ómerkja málflutning Ásdísar dóttur Jóns. En Sigurður Þór Guðjónsson rithöfundur segir málflutning Sigurðar G. taktlausan og grimmúðlegan:
„Hann er búinn að útmála Aldísi sem allt að því morðóðan vitfirring og brennuvarg sem ekki beri að taka minnsta mark á, alla tíð, vegna geðsjúkdóms þó sérfræðingar segir að hans hafi ekki orðið vart árum saman. Og hann gerir það með þeim hroka og besserwissershætti sem gerir JBH að hreinu barni. Og hann ætti að spara sér samúðaryrðin í garð Aldísar, sem hann lítlsvirðir að öðru leyti í nánast hverju orði, bara til að verja mann sem kannski er vinur hans. Svona talar enginn um manneskju sem honum er hlýtt til. Fyrirlitning væri rétta orðið, Það er alveg ljóst hvar samúð hans liggur. Bent var á það í upphafi hvað lýsing hans á þessari fb-síðu er fjarri lagi. Er með öðrum orðum hreint fleipur, Afhverju i ósköpunum ættum við að líta á annað sem hann hér segir sem annað en fleipur? Og það taktlaust og grimmúðlegt. Svo maður orði það bara hreint út.“
