Banaslys varð á Borgarfjarðarbraut rétt norðan við Flókadalsá á sjöunda tímanum í gærkvöldi þegar bifreið fór út af veginum og valt nokkrar veltur. Að sögn lögreglunnar á Vesturlandi var ökumaður bifreiðarinnar úrskurðaður látinn skömmu eftir komu á slysadeild.

Ökumaðurinn var einn í bílnum og var slökkvilið Borgarbyggðar kallað til ásamt lögreglu en beita þurfti klippum til að ná ökumanninum úr bifreiðinni. Var hann fluttur með þyrlu Landhelgisgæslunnar á Landspítala, þar sem hann úrskurðaður látinn sem fyrr segir.

Að sögn lögreglu liggja tildrög slyssins og orsakir ekki fyrir en unnið er að rannsókn málsins.