Lögmaður Johnny Bobbitt, heimilislauss manns sem komst í heimsfréttirnar í fyrra, segir að peningarnir sem safnað var fyrir hann séu horfnir.
Það var í nóvember í fyrra að sagt var frá því þegar hin 27 ára Kate McClure varð bensínlaus á þjóðvegi nærri Philadelphiu í Bandaríkjunum.
Ungur maður, sóðalegur til fara, gekk að henni og spurði hvort hann gæti mögulega aðstoðað hana. Kate sagði honum að hún hefði orðið bensínlaus og ungi maðurinn, Johnny Bobbitt, bauðst til að hjálpa henni. Hann gekk að næstu bensínstöð, notaði aleiguna sína, 20 dollara, til að kaupa bensín sem hann setti á brúsa.
Eðli málsins samkvæmt var Kate yfir sig ánægð með björgunina. Hún greiddi honum til baka og lét hann hafa mat og föt í kjölfarið. Ágæt kynni tókust á með þeim og datt Kate það snjallræði í hug að segja þessa sögu á Twitter. Sagan fór á flug og brá Kate á það ráð að hefja söfnun svo Bobby gæti að minnsta kosti haft næturstað í þokkalegu rúmi.
Söfnunin fór á flug, vægt til orða tekið, og áður en yfir lauk höfðu safnast rúmlega 400 þúsund Bandaríkjadalir, um 50 milljónir króna.
Á dögunum var svo greint frá því að Johnny hefði stefnt Kate og sambýlismanni hennar vegna gruns um að þau hefðu notað peningana í eigin þágu. Bobby hefði aðeins séð 75 þúsund dali af þeim 400 þúsund sem söfnuðust og fór hluti þeirrar upphæðar í kaup á hjólhýsi sem Bobby hafði afnot af og var komið fyrir á lóð Kate og sambýlismanns hennar.
Bobby bjó þar til að byrja með en var beðinn um að hafa sig á brott vegna fíkniefnaneyslu sinnar í júní síðastliðnum.
Chris Fallon, lögmaður Bobby, segir að peningurinn sem safnaðist sé horfinn. Hann hafi komist að þessu þegar hann ræddi við lögmann Kate og viðurkennir hann að hann og Bobby séu miður sín vegna málsins. „Þau söfnuðu þessum peningum til að hjálpa Bobby að hafa ofan í sig og á.“
Ljóst er að öll kurl eru ekki komin til grafar í málinu en forsvarsmenn GoFundMe hafa heitið því að aðstoða við rannsókn málsins. Þá hefur fyrirtækið heitið því að tryggja að sá peningur sem safnaðist renni til Bobby í formi tryggingar.
Kate og sambýlismaður hennar hafa þvertekið fyrir að hafa notað peningana en samt sem áður hafa þau ekki viljað láta þá af hendi. Hafa þau sagst hafa óttast að Bobby myndi nota peningana til að fjármagna eiturlyfjaneyslu sína.
Málið er nú til meðferðar fyrir dómstólum.
