Árið 1954 varði Roger Le Masne mörgum vikum í að leita að eldri bróður sínum, Henri Le Masne, sem hvarf sporlaust eftir að hafa skellt sér á skíði í ítölsku Ölpunum.
Þótt ótrúlegt megi virðast var það fyrst núna á dögunum sem Roger fékk fréttir af örlögum bróður síns. Árið 2005 gengu göngumenn fram á lík og kennslanefnd hefur nú komist að þeirri niðurstöðu að þarna sé kominn fram Henri Le Masne sem hvarf fyrir 64 árum.
Líkamsleifarnar fundust á Matterhorn en talið er að hann hafi villst í miklu óveðri þetta örlagaríka ár. Henri var starfsmaður í franska fjármálaráðuneytinu en daginn sem hann hvarf varð hann 35 ára.
Það var fyrr á þessu ári að lögregla sagði frá líkfundinum á samfélagsmiðlum í þeirri von að bera kennsl á líkið. Í kjölfarið höfðu aðstandendur Henri samband og nú hefur DNA-rannsókn skorið úr um hver það var sem fannst.
Roger, sem í dag er 94 ára, segir ánægður að hann hafi loks fengið staðfestar fréttir af örlögum bróður síns og að lík hans hafi fundist. Roger segir að nú verði farið í að skipuleggja útför en Henri hefði orðið hundrað ára á næsta ári.
