Farþegi Herjólfs réðst á stýrimann skipsins á leið til Landeyjarhafnar síðastliðinn föstudag. Maðurinn gekk berserksgang og þurfti hópur manns að ná manninum niður. Stýrimaðurinn er ekki alvarlega slasaður og mætti í vinnu daginn eftir.
Mbl.is greinir frá þessu. Gunnlaugur Grettisson, rekstrarstjóri Herjólfs, segir í samtali við mbl.is að málið sé litið alvarlegum augum. „Sem betur fer voru þarna á vettvangi einstaklingar sem voru tilbúnir að aðstoða, bæði úr hópi starfsmanna og farþegar sem sáu hvers kyns var“, segir Gunnlaugur í samtali við mbl.is
Gunnlaugur segir að maðurinn hafi verið erlendur ferðamaður og að hann hafi verið mjög dónalegur strax í upphafi ferðar við starfsfólk í Vestmannaeyjum. Hann segir að bæði lögreglan og öryggisdeild Eimskips hafi málið nú til skoðunar.
