Dench leikur Viktoríu drottningu í annað sinn

Leikur Viktoríu drottningu.
Judi Dench Leikur Viktoríu drottningu.

Hin ástsæla leikkona Judi Dench er orðin 82 ára gömul. Í ár á hún 60 ára leikafmæli og ný kvikmynd með henni í aðalhlutverki verður fljótlega frumsýnd. Sú heitir Victoria og Abdul og segir frá vináttu Viktoríu drottningar og indversks þjóns hennar, Abdul. Þetta er í annað sinn sem Dench leikur Viktoríu, en árið 1997 fór hún með hlutverk hennar í myndinni Mrs. Brown. Fyrir þá mynd var hún tilnefnd til Óskarsverðlauna, en alls hefur hún sjö sinnum verið tilnefnd til þeirra. Hún hlaut Óskarinn fyrir hlutverk Elísabetar I Englandsdrottningar í Shakespeare in Love.

Sjón leikkonunnar hefur daprast mjög síðustu árin og hún getur ekki lengur lesið bækur en hlustar í staðinn á hljóðbækur. Eiginmaður hennar, leikarinn Michael Williams, lést árið 2001 og þau eignuðust eina dóttur. Dench segist sjá eftir því að hafa ekki eignast fleiri börn, það hafi staðið til að eignast sex börn. Hún á vin, umhverfissinnann David Mills, en sagðist nýlega ekki ætla að ganga í hjónaband á ný þótt hún sé hæstánægð í sambandinu. Hún væri einfaldlega orðin of gömul fyrir hjónaband og auk þess myndi Mills ekki biðja hennar. Þau Mills kynntust árið 2015 og þá sagði Dench: „Það er dásamlegt að vera ástfangin, vera í því ástandi að gleðjast við að sjá einhvern sem kemur manni til að hlæja og notalegt er að vera með.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.