Sjónvarpsmaðurinn Helgi Seljan brá á leik á miðvikudag þegar Ólafur Ólafsson fjárfestir mætti á fund stjórnskipunar- og eftirlitsnefndar Alþingis. Þar sem fundurinn var ekki sendur út í beinni útsendingu var þröngt á þingi og aðstaðan fyrir fjölmiðlafólk fljót að fyllast.

Helgi kom með seinni skipunum og hringdi bjöllu til að freista þess að komast inn. Þegar kona svaraði í dyrasímann sagði Helgi: „Ég er að koma með pítsu frá Domino’s.“ Konunni var ekki hlátur í huga, sagði að fullt væri út úr dyrum og skellti á.

Helgi dó ekki ráðalaus heldur gekk inn stuttu síðar með Kristjáni Þór Júlíussyni, mennta- og menningarmálaráðherra.