Sneri sér að leiklistinni eftir tuttuga ára feril í auglýsingabransanum
Brot úr grein í helgarblaði DV sem fjallar um íslenska leikarann Einar Gunnar Einarsson, sem notast við listamannsnafnið Einar Gunn. Hann landaði litlu aukahlutverki í sjónvarpsþáttunum vinsælu Law & Order: SVU.
Einar Gunnar hefur á síðustu árum landað fjölmörgum litlum hlutverkum í bandarískum sjónvarpsþáttum eins og „The Michael J. Fox Show“, „The Mysteries of Laura“ auk „The Blacklist“ sem skartar James Spader í aðalhlutverki. „Það eru margir um hituna fyrir hvert hlutverk. Það eru yfirleitt um 500–2.000 umsóknir sem berast varðandi hvert hlutverk og af þeim komast yfirleitt 6–12 í prufur. Síðan komast tveir á lokastigið og einn hreppir hnossið. Líkurnar á að hreppa hlutverk eru því ekki miklar,“ segir Einar.
Hann þakkar umboðsmanni sínum fyrir hlutverkið í „Law & Order“. „Hans vegna komst ég með fótinn inn fyrir dyrnar og strax í prufu. Þeim leist vel á mig og atriðið sem ég lék í var síðan tekið í lok janúar,“ segir Einar. Þátturinn verður frumsýndur í Bandaríkjunum í dag, fimmtudaginn 30.mars, og kvaðst Einar vera fullur tilhlökkunar að sjá afraksturinn.
Sakamálaþættirnir Law & Order: Special Victims Units hófu göngu sína þann 20.september 1999 og fagna því brátt 18 ára afmæli sínu. Alls hafa 403 þættir verið framleiddir frá upphafi. Sögusvið Law & Order: SVU er New York-borg og en þættirnir eru oftar en ekki lauslega byggðir á raunverulegum glæpum, yfirleitt kynferðislegs eðlis, sem fjölmiðlar vestra hafa fjallað um.
Stjörnur þáttanna frá byrjun voru leikarnir Christopher Meloni og Mariska Hargitay í hlutverkum rannsóknarlögreglumannanna Elliot Stabler og Olivia Benson. Þau heilluðu sjónvarpsáhorfendur upp úr skónum með framgöngu sinni en svo fór að Meloni gerði of háar launakröfur hætti árið 2011 eftir tólf þáttaraðir. Nú er Hargitay aðalstjarna þáttarins og er ein launahæsta sjónvarpsleikkona Bandaríkjanna. Hún fær greitt um 50 milljónir króna fyrir hvern þátt.
Hin stjarna þáttarins er rapparinn fyrrverandi, Ice-T, sem hreppti hlutverk í þáttunum árið 2000 sem rannsóknarlögreglumaðurinn Odafin „Fin“ Tutuola.
Að hans sögn er sjónvarpsþáttaframleiðsla eins og vel skipulögð ringulreið. „Það er allt að gerast og allt í einu. Ef leikari er ekki með sitt á hreinu þá er maður bara til trafala. Mariska og Ice-T voru búin að vinna allan daginn og þurftu skyndilega að skipta um gír þegar kom að minni senu. Þau einbeittu sér bara að sínu starfi og mér fannst þau aðeins þurr á manninn í byrjun,“ segir Einar. Að lokum gekk hinsvegar allt upp og senan kláraðist með stæl. „Þá léttist lundin og í lokin voru faðmlög á alla kanta. Mariska og leikstjórinn hrósuðu mér fyrir frammistöðuna og það var ánægjulegt að heyra. Ég upplifði þau sem prýðisfólk, segir Einar.
Að sjálfsögðu spurðist út á tökustaðnum að hann væri frá Íslandi og það vakti mikla athygli. „Margir úr tökuliðinu höfðu mikinn áhuga á að heimsækja Ísland eða höfðu þegar ferðast þangað. Mariska hafði sérstaklega mikinn áhuga og sagðist ætla að heyra í mér og rekja úr mér garnirnar þegar kæmi að því að hún ferðaðist til landsins,“ segir Einar.
