Væntanlega hafa vinir Ögmundar Jónassonar, fyrrverandi alþingismanns og ráðherra, rekið upp stór augu þegar hann bauð þeim fyrr í dag að sækja nýársgleði Háskóladansins. Ögmundur, sem hefur ekki orð á sér fyrir að vera sérstakur dansunnandi, skýrir málið í stöðuuppfærslu.
„Nú hafa örlögin hagað því svo að ég tók að bjóða vinum á Nýársgleði Háskóladansins en ætlaði mér – og taldi mig vera – að bjóða á fyrirhugaðan hádegisfund sem ég stend fyrir í Iðnó á laugardag.“ Boðin voru því send út fyrir mistök.
Hann vonast þó til þess að vel verði mætt á nýársgleði dansfólksins „og að sjálfsögðu einnig í Iðnó á laugardag.“
„Svona getur lífið tekið undarlegustu vendingar,“ skrifar hann.