„Ég trúi að lífið leiði okkur þangað sem við viljum og þurfum að fara“
Hjónin Ágústa Margrét Arnardóttir og Guðlaugur Birgisson eru á leiðinni til Spánar í nokkrar vikur með fimm börn sín á aldrinum 10 mánaða til 12 ára. Það væri í sjálfu sér kannski ekki frásagnarvert, nema að þau hafa ekki pantað heimferðina og börnin sem eru í skóla munu fá heimakennslu, svokallaða „world- eða wildschooling.“ Ágústa var í viðtali við Austurfrétt þar sem hún sagði frá hvað varð til þess að þau tóku ákvörðun um þessa ævintýraferð.
Ágústa og Guðlaugur ráku hvort sitt fyrirtækið sem og sjö manna heimili. „Ómeðvitað notuðum við orðið „bíddu“ og „seinna“ allt of oft við börnin en sem betur fer gerðust atburðir sem urðu til þess að ég áttaði mig á því hve hratt tíminn líður, börnin er börn í stuttan tíma, lífið er núna og eins gott að ná því besta úr því,“ segir Ágústa í viðtalinu við Austurfrétt.
„Við Guðlaugur tókum því sameiginlega ákvörðun að einbeita okkur frekar að einu fyrirtæki í einu og skapa lífsstíl sem hentar okkur öllum betur. Ég ákvað því að staldra við og hugsa allt sem snýr að mér, mínum frama og fjölskyldunni upp á nýtt og gera breytingar. Markþjálfari hjálpaði mér mikið í þessu ferli, ég féll algjörlega fyrir faginu og skellti mér í háskólanám í því.“
Í viðtali við DV segir Ágústa að þau þau ætli að vera í nokkrar vikur, en þau hafa ekki pantað heimferðina. „Við erum með börnin hér i skola og maðurinn minn í vinnu en við nýtum fæðingarorlofið hans í þessa ferð. Við erum svo að skipuleggja aðra ferð á annan stað síðar á árinu. Og erum undanfarið ár buin að vinna að því að byggja upp lífstíl, skipuleggja störfin, heimilið, fjárhag, fyrirtæki og ótal margt annað þannig að við getum verið i bland hér heima og á flakki.“
Ágústa fór fyrst erlendis 19 ára og bjó á nokkrum stöðum þar til hún var 27 ára, þá kom hún heim, eignaðist börn og ætlaði alltaf að flækjast meira um heiminn.
„En svo fór lífið, skyldur, heimilið, atvinnur og fleira að flækjast fyrir ferðaplönunum og ekkert varð úr neinu. Þannig að þetta er alveg stórt skref og margt sem þarf að huga að og ég er náttúrulega ótrúlega spennt að sjá hvort þetta virki. Meginhvatinn af þessum lífstíl er að ég vil eyða meiri tíma með fjölskyldunni og vil að börnin kynnist heiminum, og læri meira en íslenska skólakerfið býður upp á. Ég get ekki hugsað mér að þeirra 10 ára grunnskólaganga (rúmlega 20 ára tímabil sem ég verð með börn alls i grunnskóla) verði eingöngu hér.“
