YouTube notandinn David Atkins sérhæfir sig í þeirri kúnst að rýna í Eurovision-lög á rásinni sinni. Í nýju myndbandi sem hann birti svarar hann þeirri beiðni að horfa á og bregðast við laginu Hatrið mun sigra frá hljómsveitinni Hatara. Lagið komst í úrslit Söngvakeppninnar og er eitt fimm laga sem munu mætast í einvígi í Laugardalshöll um aðra helgi. Þá ræðst hvaða lag fer fyrir Íslands hönd til Ísraels í Eurovision. Ef David fengi einhverju ráðið myndi hann að líkindum senda Hatara.

„Þetta er úr allt öðrum geira en við erum vön, en sagan hefur sýnt að Lordi gekk vel með slíka tilraun á sínum tíma,“ segir David meðal annars í myndbandinu. „Ég kann að meta fjölbreytni í Eurovision og við þurfum fleiri svona lög til að keppnin verði áhugaverðari.“

Eftir því sem á líður viðurkennir David að atriðið sé heldur ruglandi og telur það vera mínus að hann viti ekkert hvað söngvararnir eru að segja. Hins vegar segir David lagið vera ferskan andblæ í samanburði við framlag Íslands í keppnina í fyrra, þegar Ari Ólafsson steig á sviðið með lagi sem fékk heldur blendnar viðtökur.

David hrósar einnig sviðsetningunni og telur líklegt að lagið trylli salinn á Eurovision-keppninni ef það kemst alla leið. En þrátt fyrir að hrósa nálguninni og ferskleikanum sem fylgir laginu vill David meina að hann myndi ekki kjósa lagið persónulega, en kann svo sannarlega að meta tilraunina.

Rýni Davids á Hatara má finna í heild sinni hér að neðan.