Söngkonan Björk Guðmundsdóttir, einn frægasti Íslendingur allra tíma hefur sett þakíbúð sína í Brooklyn í New York á sölu. Íbúðin er eins og við var að búast ekkert slor en hún inniheldur til að mynda fjögur baðherbergi og fjögur svefnherbergi. Íbúðin er 278 fermetrar að stærð.
Það er Variety sem greinir frá þessu og birtir myndir sem sjá má hér að neðan. Samkvæmt frétt blaðsins er eignin metin á 9 milljónir dollara eða tæplega milljarð íslenskra króna. Björk festi kaup á henni ásamt Matthew Barney, fyrrverandi eiginmanni sínum árið 2009. Þá greiddu þau hjón fjórar milljónir dollara fyrir íbúðina.
Á vef Variety er greint frá því að Björk eigi húsið nú ein en hún ku hafa keypt hlut Barney fyrir 1,6 milljónir dollara þegar þau slitu samvistum.