Uppboðshúsið Christie’s í New York reiknar með að 80 milljónir Bandaríkjadala, níu milljarðar króna, fáist fyrir listaverk enska listmálarans David Hockney þegar það verður boðið upp á næstunni.
Ef svo fer verður listaverkið það verðmætasta eftir listamann sem enn er á lífi, en Hockney, sem er 81 árs, málaði verkið árið 1972.
Í frétt breska blaðsins Telegraph segir að verkið sé í eigu milljarðamæringsins Joe Lewis, en Lewis þessi er einna þekktastur fyrir að vera eigandi enska úrvalsdeildarfélagsins Tottenham Hotspur.
Hockney er meðal merkustu núlifandi listamannanna en hans dýrasta verk, hingað til að minnsta kosti, seldist á 28,5 milljónir dala á uppboði í New York fyrr á þessu ári.
