Það er ekki á hverjum degi sem hægt er að kaupa sig aftur í tímann en segja má að hinn draugalegi burstabær Stóri-Kollabær sé einskonar tímavél. Bærinn, sem er í eigu Skógræktarinnar, er nú til sölu á vegum Ríkiskaupa.

Stóri-Kollabær er í Fljótshlíðinni í Rangárvallarsýslu sem telja má sem sérlega eftirsóttan stað. Bærinn er í rúmlega átta kílómetra fjarlægð frá Hvolsvelli.

Um er að ræða timburhús sem eru þrjár burstir. Húsið er í niðurnýslu og Inngangur um vestari hlutann er um miðhúsið og austur hlutinn er með sérinngangi. Ekki er innangengt milli austurhússins og miðhússins. Húsin eru skráð 81,5 m². Byggingarárið er 1935 samkvæmt skráningu, en á vef Skógræktarinnar kemur fram að vestari burstirnar tvær séu mun eldri en sú austasta og tilheyrðu áður torfbyggingum. Í kjallaranum eru merkar hleðslur.

Húsið þarfnast talsverðs viðhalds en austasti hlutinn er í talsvert betra ástandi en sá vestari. Yfirfara þarf allar lagnir. Sá sem kaupir bæinn þarf að halda ytra útliti húsanna en hægt er að sækja um styrk til endurbóta hjá Minjastofnun.

Óskað er eftir tilboðum í bæinn. Fasteignamatið er 8,1 milljón króna. Brunabótamat 18,7 m.kr. Bærinn stendur á 2000 fermetra leigulóð, gerður verður lóðarleigusamningur til 50 ára um lóðina. Leiguverð á ári er 4% af fasteignamati lóðar en þó aldrei lægra en 73 þús. kr. á ári og breytist í samræmi við byggingarvísitölu. Miðað við ástand hússins ætti að vera hægt að fá það á góðum kjörum. Þarna eru mikil tækifæri fyrir laghenta að koma þessu draugalega húsi í stand.

Hér fyrir neðan má sjá myndir af Stóra-Kollabæ.