Daði Freyr Pétursson tónlistarmaður er næsti þátttakandi Í Takt við tímann á vef DV. Hann spreytir sig á þeirri áskorun að semja lag frá grunni á aðeins tíu mínútum.  Jói Pé, Króli og Þormóður Eiríksson spreyttu sig á lagasmíðinni í seinustu viku og má sjá útkomuna hér.

Neðst í fréttinni má horfa á stutt myndskeið þar sem má sjá Daða semja lagið og flytja það. Það er ótrúlegt að tónlistarmaðurinn nái að setja saman lag á þessum stutta tíma.

Daði Freyr heillaði Íslendinga upp úr skónum þegar hann tók þátt í Söngvakeppni Sjónvarpsins á seinasta ári og endaði í öðru sæti á eftir Svölu Björgvinsdóttur. Í kjölfarið skrifaði Pálmar Ragnarsson á Vísi:

„Við höfum eignast nýja þjóðhetju. Hún kemur ekki í formi íþróttagarps eða stjórnmálakonu heldur venjulegs hæfileikaríks drengs í grænni peysu. Daði sýnir strákum að þú þarft ekki að vera vöðvaður og tanaður til að vera töff. “

Daði hóf ferilinn með hljómsveitinni Orchestra of Few en í þeirri hljómsveit var meðal annars Kristján Pálmi Ásmundsson. Árið 2011 stofnuðu þeir hljómsveitina RetRoBot og ári síðar sigraði hljómsveitin Músíktilraunir auk þess sem Daði var valinn rafheili ársins. Ári síðar gaf sveitin út plötuna Blackout. Daði hefur stundað nám við upptökustjórnun og hljóðvinnslu í Berlín en árið 2014 byrjaði hann að spila undir nafninu Mixophrygian og ári síðar gaf hann út plötuna Forever.

Þáttastjórnandi þáttanna Í Takt við Tímann er pródúserinn og raftónlistarmaðurinn Guðni Einarsson. Guðni hefur verið viðloðinn íslensku raftónlistarsenuna um langt skeið. Þá hefur hann gefið frá sér fjölda platna, endurhljóðblandanna, nú síðast endurhljóðblöndun af laginu Featherlight á plötunni Lies are more flexible en var það gert í samstarfi við GusGus.

Í Takt við tímann eru nýstárlegir þættir og hefur þetta form ekki verið reynt áður í íslenskri dagskrárgerð.

Hér fyrir neðan má sjá þegar Daði spreytir sig á því að semja lagið. Fyrir þá sem vilja meira þá má horfa á lengri útgáfu af þættinum hér.

Góða skemmtun!