Sigríður Thorlacius og Sigurður Guðmundsson gáfu fyrir helgi út nýtt lag, haust- og vetrarlag, en lagið nefnist Vindar að hausti.
Lagið er róleg bossa nova ballaða og er sótt til Brasilíu, á portúgölsku heitir það Águas de Março og sá Birkir Blær Ingólfsson um íslenskan texta.
„Það veitti ekki af eftir þetta mikla svikasumar sem við fengum að spýta í smá sumarfíling svona rétt fyrir jólin. Við höfum alltaf reynt að leyfa lögunum að vera þannig að þau nýtist aðeins umfram enga spilun nema í desember þannig að það er gott að vera með vetrarvæn lög,“ segir Sigurður í viðtalið við Fréttablaðið.
Sigga og Siggi halda jólatónleika í Eldborg 17. desember og eftir það á Græna hattinum á Akureyri. GÓSS, sem eru þau tvö auk Guðmundar Óskars, verða í Iðnó 31. október og Skyrgerðinni Hveragerði 16. nóvember. Siggi er einnig í Ellý, sýningu Borgarleikhússins og mun einnig koma á jólatónleikum Baggalúts.
