Það hefur gengið erfiðlega hjá fyrrum spretthlauparanum Usain Bolt að finna sér knattspyrnufélag.

Bolt hefur undanfarna mánuði reynt að finna sér lið og hefur farið á reynslu hjá nokkrum félögum.

Hann yfirgaf Central Coast Mariners í Ástralíu fyrr í mánuðinum en hann náði ekki að semja við liðið.

Hann gaf svo út að hann myndi gefa þessu út mánuðinn og gæti svo gefið drauminn upp á bátinn ef ekkert gengur.

Samkvæmt fréttum dagsins mun Bolt fá líflínu frá hinum goðsagnarkennda Diego Maradona.

Maradona er þjálfari Dorados í næst efstu deild í Mexíkó og var hrifinn af Bolt er hann sá hann spila góðgerðarleik fyrr á árinu.

Eini vandinn eru þó launin sem Dorados þyrfti að borga Bolt en Maradona leitar nú að styrkaraðilum sem gætu hjálpað til.