Aron Einar Gunnarsson fyrirliði Íslands er að gefa út ævisögu sína en þar fer hann yfir hluti sem ekki hafa komið áður fram. Vísir.is fjallar um hluta af bókinni.

Þar segir Aron frá því að hann hafi djammað mikið sem ungur leikmaður og þá sérstaklega í Coventry.

Þar hafi hann farið út á lífið hverja helgi en þetta kemur fram í bókinni. Um er að ræða tímabil frá 2009 til ársins 2012.

„Þegar ég var upp á mitt virkasta var þetta orðið þannig að ég fór á djammið með strákunum eftir leik á laugardegi og svo fór maður aftur út á sunnudeginum og fékk sér 4-5 bjóra og mætti svo á æfingu á mánudegi. Þetta var svo endurtekið helgina eftir – og þá næstu,“ segir Aron en Vísir.is birtir þennan hluta.

„Þegar ég lít til baka hugsa ég að þetta djammtímabil hafi verið eitthvað sem ég þurfti einfaldlega að taka út fyrr eða síðar. Ég hafði svo gott sem misst af öllu félagslífi með félögunum heima og þarna gafst tækifæri til að prófa þetta allt saman af krafti í skemmtilegum hópi.“

Á sínu þriðja ári hjá Coventry var Aron áfram á djamminu og var mjög virkur þar.

„Það er engin spurning að djammið setti strik í reikninginn hjá mér þennan veturinn sem einkenndist af hálfkáki. Ég hélt að ég væri algjör spaði og ég þyrfti ekki lengur að hafa fyrir hlutunum, eins og þetta væri bara komið hjá mér,“ segir Aron sem hafði kynnst svipuðum týpum í Hollandi.