Chris Gunter, varnarmaður Reading á Englandi, verður í byrjunarliði Wales á þriðjudaginn gegn Albaníu en leikurinn fer fram ytra.

Þetta hefur Ryan Giggs, landsliðsþjálfari Wales staðfest en Gunter mun þar leika sinn 93. landsleik.

Gunter er aðeins 29 ára gamall en hann verður leikjahæstur í sögu landsliðsins er hann spilar á þriðjudag.

Hann ætlar að biðja liðsfélaga sinn Gareth Bale, leikmann Real Madrid, um greiða fyrir leikinn merkilega.

,,Þetta verður sérstakt kvöld. Ég ætla að biðja Gaz um að fá flugvélina hans í láni svo ég geti fengið fólk á völlinn. Ef hún er laus er ég viss um að það sé hægt,“ sagði Gunter.

,,Ég vil reyna að fá fjölskylduna með mér. Þetta er ekki auðveldasti staðurinn til að komast til en ef okkar stuðningsmenn geta komist þá getum við fundið leið.“

,,Það eru fjölskyldumeðlimir sem hafa horft á hvern einasta leik sem ég hef spilað, hvort sem það sé í sjónvarpinu eða á vellinum.“