Guðjón Pétur Lýðsson er genginn í raðir Grindavíkur frá ÍBV. Þetta var staðfest skömmu fyrir lok félagaskiptagluggans í gær.
Miðjumaðurinn gerir samning út næstu leiktíð. Hann var úti í kuldanum fyrr á þessari leiktíð í kjölfar rifrildis við Hermann Hreiðarsson, þjálfara ÍBV. Síðan hefur hann þó aftur komið inn í hópinn.
Guðjón Pétur kom til ÍBV frá Breiðabliki í fyrra. Hann hafði verið á láni hjá Stjörnunni tímabilið áður.
Þessi 34 ára gamli leikmaður á að baki langan meistaraflokksferil. Hann varð til að mynda Íslandsmeistari með Val 2017 og 2018.
Grindavík er í áttunda sæti Lengjudeildarinnar með 17 stig, ellefu stigum á eftir öðru sæti en níu stigum fyrir ofan fallsæti.
Liðið tekur á móti Þór klukkan 18 í kvöld.