Louie Scott bróðir Jesse Lingard lét svo sannarlega í sér heyra á Instagram í gær eftir að bróðir hans var ónotaður varamaður í sigri liðsins á Brentford í gær.

Samningur Lingard er á enda í sumar og var þetta síðasti leikurinn þar sem hann er í hóp á Old Trafford. Lingard fékk ekki að taka þátt í leiknum og er Scott brjálaður vegna þess.

Á sama tíma fengu Juan Mata, Edinson Cavani og Nemanja Matic að kveðja stuðningsmenn félagsins en báðir fara frá félaginu í sumar.

„Tuttugu ár af blóði, svita og tárum. Fjórir titlar, þrír bikarúrslitaleikir. Fær ekki einu sinni að kveðja, ekki skrýtið að félagið sé á leið í Sambandsdeildina,“ skrifar Scott ansi reiður.

Hann hjólar svo fast í Glazer fjölskylduna sem á félagið. „Það er ráðist á leikmenn fyrir fögn þeirra þegar félagið ætlaði sér í Ofurdeildina. Félagið er rekið af fólki sem þekkir ekki einu sinni rangstöðuna. Vantar allan klassa og stuðningsmenn verða að fatta það.“

„Lingard hefur verið hérna frá níu ára aldri og fékk ekki að kveðja. Vel gert bróðir, við erum stolt af þér.“