Þó að Cristiano Ronaldo sé fyrrverandi leikmaður Manchester United og að margra mati einn allra besti knattspyrnumaður sögunnar er það Lionel Messi sem er uppi á vegg í búningsklefa Manchester Unied á Carrington-æfingasvæðinu.

Á myndinni sést Lionel Messi í búningsklefa West Ham á Upton Park fyrir æfingaleik Argentínu og Króatíu árið 2014. Messi, sem er einn launahæsti íþróttamaður heims og óumdeilanlega einn sá besti í sögunni, sést pússa skóna sína á myndinni.

Ástæða þess að myndin hangin uppi á vegg á æfingasvæði United er sú að hún á að minna leikmenn á að jafnvel bestu leikmenn heims sjá sjálfir um skítverkin ef svo má segja. Þeir pússa skóna sína, ganga vel um og þó þeir séu með há laun og mikils metnir eru þeir auðmjúkir og lítillátir innst inni.

Þetta er meðal þess sem kom fram í áhugaverðri umfjöllun Times um það sem gerist á bak við tjöldin hjá Manchester United.

Í umfjölluninni kom einnig fram að Scott McTominay, miðjumaðurinn ungi sem hefur staðið sig vel í vetur, leggi ávallt bíl sínum fjarri lúxusbifreiðum leikmanna aðalliðsins. Leggur hann bílnum á sama stað og aðrir leikmenn í unglingaliðum Manchester United þó hann hafi fullt leyfi til þess að leggja honum nær æfingasvæðinu þar sem hann æfir og spilar með aðalliðinu.

Ástæðan fyrir þessu eru sú að McTominay, sem er alinn upp í herbúðum United, lítur svo á að hann sé einn af ungu leikmönnunum og á sama stalli og aðrir ungir leikmenn félagsins. Þeir geti fetað í hans fótspor og fengið tækifæri með aðalliðinu líkt og hann sjálfur gerði með svo góðum árangri.