Knattspyrnumenn frá Afríku falla reglulega frá í leik – Erfitt að útskýra af hverju
Því miður gerist það reglulega að knattspyrnufólk lætur lífið innan vallar og oftar en ekki er það vegna þess að hjartað gefur sig. Erfitt er að átta sig á því hvers vegna þetta gerist enda atvinnumenn í íþróttum skoðaðir í bak og fyrir reglulega. Hjarta þeirra er skoðað og þeir sem deyja eru yfirleitt taldir vera með hjarta sem á að vera í góðu lagi. Þá vekur það líka mikla furðu að 75 prósent þeirra atvinnumanna í knattspyrnu sem deyja á knattspyrnuvelli vegna hjartavandamála eru frá Afríku. Þetta kemur fram í rannsókn sem gerð var í Nígeríu þar sem málið var skoðað frá árinu 1990. Skýringin á þessu hefur þó ekki fundist.
Knattspyrnumaðurinn Cheick Tiote lést á dögunum þegar hann lék með Beijing Enterprises í Kína. Tiote gekk í raðir félagsins í upphafi árs frá Newcastle á Englandi. Hjá Newcastle hafði þess aldrei orðið vart, í fjölda rannsókna, að Tiote glímdi við einhver vandamál tengd hjartanu. Tiote fór til Kína þar sem hann fékk afar vel borgað og í læknisskoðunum þar í landi fundu menn ekkert að honum tengt hjartanu. Tiote lék þann 3. júní í 4-2 sigri á Baoding og tveimur dögum síðar á æfingu féll þessi þrítugi leikmaður frá Fílabeinsströndinni frá. Um er að ræða knattspyrnumann í frábæru formi sem var á besta aldri, og menn finna engar skýringar á því hvernig þetta gat gerst.
Sanjay Sharma er sérfræðingur í hjartamálum og hún ræddi málið við BBC. „Tölfræði sem hefur verið tekin saman sannar að líkurnar á hjartaáfalli í íþróttum eru 1 á móti 48 þúsund. Þegar málið er svo skoðað nánar kemur í ljós að hjá svörtu íþróttafólki eru líkurnar 1 á móti 18 þúsund – þegar kemur að svörtum karlmönnum,“ sagði Sharma sem benti einnig á að knattspyrnusambandið í Englandi hefði skoðað unga leikmenn og þar væru líkurnar 1 á móti 25 þúsund að ungir hvítir leikmenn fengju hjartaáfall í leik en 1 á móti 4 þúsund hjá ungum svörtum leikmönnum. Svartir leikmenn eru því sex sinnum líklegri til að deyja innan vallar en hvítir leikmenn þrátt fyrir að líkurnar séu litlar hjá báðum.
Eins og fram hefur komið í greininni er ekkert sem skýrir af hverju fleiri leikmenn frá Afríku falli frá í íþróttum frekar en til dæmis hvítir íþróttamenn. Sharma segir hluta af skýringunni geta verið að rannsóknir og þekking lækna í Afríku sé minni og sérfræðiþjónusta í málum af þessum toga oft lítil. Vandamálið sé mjög stórt og ekki sjái fyrir endann á því í bráð, spurningin sé hvort hægt sé að koma í veg fyrir þetta með frekari rannsóknum en eins og staðan sé í dag geri leyndir hjartagallar og fleira læknum erfitt fyrir.
Þrátt fyrir að erfitt sé um vik í dag að sjá hvort menn séu með falda hjartagalla eða annað slíkt telja læknar að vísindum þar að lútandi fleygi ört fram og að í framtíðinni verði hægt að koma í veg fyrir svona áföll innan vallar. „Ef maður skoðar allar rannsóknir þá sér maður að sumir koma eðlilega út úr öllum prófum en eru samt sem áður með hjartagalla, þetta kallast fölsk niðurstaða. Það er ekki þannig að próf séu framkvæmd á rangan máta, þetta er eitthvað sem kæmi fram í prófum sem við höfum ekki í dag. Það er alltaf framþróun í læknavísindum, sem gætu hjálpað á næstu árum,“ sagði dr. Ian Beasley sem var læknir hjá landsliði Englands.
Sömu sögu er að segja af körfuboltamönnum í Bandaríkjunum en í rannsókn sem var gerð þar í landi á dögunum leiddi í ljós að svartir körfuboltamenn eru sjö sinnum líklegri til þess að fá hjartaáfall innan vallar en hvítir körfuboltamenn. Þrátt fyrir allar þessar staðreyndir finna menn ekki ástæður þessa.
