Grunaður um aðild að mannráni
Óvenjulegt atvik átti sér stað í brasilísku 2. deildinni í knattspyrnu í gær þegar framherjinn Marlon Nathanael Alexandre Lima var handtekinn í miðjum leik grunaður um mannrán.
Hinn 21 árs gamli Marlon sat á varamannabekk Grêmio Esportivo Sapucaiense á heimavelli liðsins, Rio Grande do Sul þegar lögreglumenn mættu á vettvang, handtóku hann færðu í gæsluvarðhald. Marlon er grunaður um að tilheyra glæpagengi sem nam manneskju á brott í verslunarmiðstöð og notaði síðan greiðslukort viðkomandi ótæpilega meðan henni var haldið fanginni.
Korter var búið af leiknum þegar Marlon var færður á brott í járnum. Sex aðrir meintir glæpagengismeðlimir voru handteknir í aðgerðum lögreglunnar.
Eftir að Marlon var handtekinn komu í ljós þrjár handtökuskipanir sem gefnar höfðu verið út á hann, meðal annars í tengslum við sambærilegt mál. Þá hafði hann einnig verið handtekinn í fyrra fyrir að aka um á stolnum bíl.
Marlon neitar sök.
Myndband af atvikinu má sjá hér fyrir neðan.