Danir halda ekki vatni yfir árangri danska landsliðsins í handbolta – Vinnusamur og trúr sínu
Guðmundur Þórður Guðmundsson er þjóðhetja í Danmörku eftir að hafa stýrt danska karlalandsliðinu í handknattleik til sigurs á Ólympíuleikunum í Ríó. Þetta er í fyrsta skipti sem karlalið Dana í handknattleik vinnur gullverðlaun á Ólympíuleikum og halda danskir fjölmiðlar ekki vatni yfir árangri liðsins. Guðmundur þykir hafa stýrt liðinu frábærlega.
Í allri gleðinni eru Danir farnir að kalla Guðmund Þórð Guðmundsson „Gullmund“. Fannst mörgum það við hæfi því undir stjórn hans unnu Danir gull sem engum dönskum þjálfara hafði tekist áður með karlaliðið. Guðmundur hefur á stundum mátt þola harða gagnrýni hjá dönskum fjölmiðlum þá 18 mánuði sem hann hefur verið í starfi. Nú er Guðmundur kominn í dýrlingatölu og menn vilja að við hann verðir gerður langtímasamningur.
Guðmundur á sjálfur að baki 236 landsleiki og skoraði í þeim 358 mörk. Þegar ferlinum lauk sneri Guðmundur sér fljótlega að þjálfun og þar átti hann eftir að láta til sína taka sem þjálfari í fremstu röð. Undir stjórn hans náði Ísland fjórða sætinu á EM í Svíþjóð 2002 og stærsta afrekið eru silfurverðlaunin á ÓL í Peking 2008. Tveimur árum síðar vann Ísland bronsverðlaun á EM í Austurríki undir stjórn Guðmundar.
„Árangur Guðmundar kemur mér bara ekkert á óvart því hann er einhver samviskusamasti þjálfari sem sögur fara af. Hann er slunginn, útsjónarsamur og vinnusemin er einstök.“ Þetta segir Þorbjörn Jensson, fyrrverandi landsliðsþjálfari Íslands, um Guðmund.
Hann segir að það loði við íslenska þjálfara að þeir sinni starfi sínu vel og nái þess vegna árangri. Það sé lykillinn að velgengni þeirra Guðmundar með danska liðið og Dags Sigurðssonar með það þýska. „Guðmundur er af lífi og sál í þessu starfi með danska liðið og ég held að eftir úrslitaleikinn hafi hann verið gjörsamlega búinn. Guðmundur er fastheldinn og býr orðið yfir gríðarlegri reynslu. Þegar komið er svona langt í keppninni þá þarf að koma með eitthvað óvænt, eitthvað sem leikmennirnir grípa og hafa trú á.“ Hann segir að Guðmundur hafi hitt naglann á höfuðið og það hafi ekki komið honum á óvart. „Það hafa nokkrir danskir snillingar verið að taka hann niður og það hefði getað komið niður á árangri hans. Hann er bara svo staðfastur í því sem hann er að gera og lætur ekki gagnrýnina trufla sig,“ segir Þorbjörn.
Valdimar Grímsson, fyrrverandi landsliðsmaður, sem lék lengi með Guðmundi, segir að þessi árangur Guðmundar með danska liðið ætti í raun ekki að koma neinum á óvart sem þekkja til Guðmundar. „Hann á engan sinn líka, hann er framúrskarandi og öll vinna sem hann tekur sér fyrir hendur er unnin af fagmennsku. Guðmundur er að uppskera eins og hann hefur til sáð.“
Valdimar segir Guðmund hafa óbilandi trú á því sem hann geri. Oft sé sagt að hann hefði farið lengra með íslenska liðið hefði hann fengið til þess meiri stuðning. „Guðmundur er einstakur á sinn hátt og vinnusemin og eljan skilar honum þessum frábæra árangri. Hann er áræðinn, fylginn sér og hefur óbilandi trú á því sem hann tekur sér fyrir hendur. Þetta er hans styrkur í hnotskurn,“ segir Valdimar.