Cristiano Ronaldo, einn besti fótboltamaður heims og fyrirliði portúgalska landsliðsins í fótbolta, hefur verið með allt á hornum sér á Evrópumótinu sem nú stendur yfir í Frakklandi.

Í morgun tók steininn úr þegar Ronaldo grýtti hljóðnema fréttamanns út í vatn. Fréttamaðurinn brá sér að Ronaldo sem var í göngu með liðsfélögum sínum þegar atvikið varð. Ronaldo greip í hljóðnemann og henti honum í vatnið. Óhætt er að segja að uppátæki þessa frábæra knattspyrnumanns hafi komið fréttamanninum í opna skjöldu og eflaust fleirum sem fylgdust með.

Ronaldo var pirraður eftir fyrsta leik Portúgala gegn Íslendingum en leikurinn endaði sem kunnugt er 1-1. Ronaldo gagnrýndi spilamennsku íslenska liðsins harðlega eftir leik. Portúgal gerði svo jafntefli gegn Austurríki í næsta leik sínum, en í þeim leik klúðraði Ronaldo vítaspyrnu.

Portúgalska liðið á nú í hættu að falla úr leik á EM. Liðið mætir Ungverjalandi í kvöld og ef svo fer að Ungverjaland sigrar þá fara Cristiano Ronaldo og félagar í snemmbúið sumarfrí.