Slagsmál í leik Fylkis og ÍBV í Pepsi-deild kvenna – Máni hrósar stelpunum
„Ég ætla nú að benda á það – og hrósa báðum þessum stelpum fyrir – að ef þetta hefði gerst í karlabolta, og mótmæli hver sem getur, þá væru karlmennirnir búnir að henda sér svona 10-15 sinnum niður,“ sagði Þorkell Máni Pétursson, sérfræðingur í Pepsi-mörkum kvenna á Stöð 2 Sport, í gærkvöldi.
Slagsmál brutust út í leik Fylkis og ÍBV í Pepsi-deild kvenna á miðvikudaginn. Þar áttust við Fylkiskonan Rut Kristjánsdóttir og Eyjakonan Cloe Lacasse, en þær létu hnefana tala. Vísir fjallaði um þetta.
Dómari leiksins gaf þeim báðum gult spjald en að mati Mána og og Rakel Logadóttur, sem voru í settinu með þáttastjórnandanum Helenu Ólafsdóttur, gerðu dómari leiksins sig sekan um mistök þegar hann lyfti gula spjaldinu í stað þess rauða.
„Hefði þetta verið í karlabolta hefði alltaf verið dæmt,“ sagði Máni sem bætti við að aðstoðardómarinn hefði einnig átt að grípa inn í, enda gerðist atvikið fyrir framan hann. En Máni sá ástæðu til að hrósa þeim Rut og Cloe fyrir að sýna ekki leikræna tilburði í þeirri von að fiska aðra hvora út af vellinum með rautt spjald.
„Við sjáum það að þær ætla að klára þessi slagsmál. Það er bara þannig. Þær ætla bara að standa og hafa það mikla sjálfsvirðingu að þeim dettur ekki í hug að henda sér niður. Ég ætla að hrósa fyrir það.
Myndband af atvikinu má sjá á vef Vísis.