Tveir menn voru gripnir með óleyfileg veiðarfæri í Hallá á þriðjudagskvöldið og voru í fórum þeirra fjórir laxar en í Hallá er einungis leyfð veiði á flugu og skal öllum laxi sleppt. Meðal veiðarfæra voru maðkastangir, maðkabox, spúnar og fleira sem ekki telst til fluguveiðibúnaðar.

Mennirnir voru að klára þriðju vaktina af fjórum og því líklegt að fleiri löxum hafi verið landað án sleppingar. Annar mannanna var á fjórhjóli þegar veiðivörður hafði afskipti af mönnunum. Sá flúði af vettvangi á meðan hinn sat í súpunni og vildi ekki kannast við að eiga laxa í pokum í skotti á bíl sínum, heldur hafi sá sem var á fjórhjólinu átt þá og hann hafi aðeins haft þá til geymslu.

Veiðarfæri og afli voru gerð upptæk og var veiðimönnum umsvifalaust vikið úr ánni og hefur málið verið kært til lögreglu. Mennirnir voru ekki skráðir veiðileyfishafar í Hallá en skráður leyfishafi hollsins hefur ekki tjáð sig um hvort veiðimennirnir hafi verið í hans umboði eða í leyfisleysi.