Eftir frekar dapra byrjun hefur veiði í Fáskrúð í Dölum heldur betur tekið við sér. Nú um miðjan september voru komnir yfir 200 laxar á land og áin full af fiski að sögn Einars Kristjáns Jónssonar eins af umsjónarmönnum árinnar.
Það vekur auk þess ánægju að laxinn kemur vel haldinn úr sjó og er stærri og þykkari en undanfarin ár. Þetta sumar er það þriðja þar sem einungis er veitt á flugu og með hóflegum kvóta um dráp á veiddum laxi. Veiðimenn virðast taka vel í þessa breytingu því nú er svo komið að langstæstum hluta laxa sleppt sem veit á gott um framtíð fiskistofnsins í Fáskrúð.
„Það er veitt til 30. september og miðað við það magn af fiski sem er í Fáskrúð gerum við okkur vonir um að áin endi nálægt 250 löxum sem er flott veiði enda áin veidd að stærstum hluta veiðitímabilsins með tveimur stöngum,“ segir Einar.
Mynd: Kastað í veiðistaðinn Viðbjóð í Fáskrúð í Dölum sem hefur verið einn fengsælasti staðurinn í ánni.
