Andrés Mountbatten-Windsor, áður þekktur sem Andrés Bretaprins, hefur verið handtekinn vegna gruns um misferli í opinberu starfi. Frá þessu greinir BBC.

Prinsinn fyrrverandi, sem fagnar 66 ára afmæli sínu í dag, var handtekinn nú í morgun af lögreglunni í Thames Valley. Handtakan tengist rannsókn á meintu misferli í opinberu starfi og mun Andrés nú sitja í fangaklefa.

„Í tengslum við rannsókn handtókum við í dag (19. febrúar) mann á sjötugsaldri frá Norfolk, grunaðan um brot í opinberu starfi, og erum að framkvæma húsleit á heimilisföngum í Berkshire og Norfolk,“ segir í yfirlýsingu lögreglu þar sem tekið er fram að í samræmi við lög og reglur verði hinn handtekni ekki nafngreindur að svo stöddu og eru fjölmiðlar beðnir um að gæta varúðar við birtingu persónuupplýsinga. Lögreglan segist gera sér grein fyrir þeim áhuga sem almenningur hefur á málinu og verða fleiri upplýsingar veittar þegar tilefni gefst.

BBC greinir frá því að ómerktir lögreglubílar hafi sést í morgun við dvalarstað Andrésar í Sandringham-höll. Þetta mun vera í fyrsta skipti sem Andrés er handtekinn. Til rannsóknar er meðal annars hvort Andrés hafi lekið trúnaðarupplýsingum þegar hann starfaði sem sérstakur erindreki Bretlands, þar með talið til níðingsins Jeffrey Epstein, en vinskapur Andrésar og Epsteins hefur þegar leitt til þess að Andrés var sviptur konunglegum titlum.

Keir Stamer forsætisráðherra Bretlands sagði fyrr í vikunni að enginn í landinu sé yfir lögin hafin þegar hann var spurður út í mál Andrésar.