Eduardo Valdivia, 41 árs lögreglumaður hjá bandarísku alríkislögreglunni FBI, var nýlega sakfelldur fyrir að hafa nauðgað þremur konum eftir að hann lokkaði þær inn í húðflúrstofu sína. Hann lofaði þeim ókeypis húðflúrum og samningum sem fyrirsætum.

The Independent skýrir frá þessu og segir að Valdivia hafi starfrækt húðflúrstofur undir nöfnunum Lalo Brown og El Boogie. Þar hafi hann starfað þegar hann var ekki í vinnunni hjá FBI.

Hann notaði fölsk nöfn og Instagram til að lokka konur inn á DC Fine Line Tattoos með loforðum um ókeypis húðflúr og fyrirsætusamninga. Hann réðst síðan á þær og beitti kynferðislegu ofbeldi og tók ofbeldið upp.

Valdivia, sem er kvæntur þriggja barna faðir og hafði starfað hjá FBI síðan 2011, notaði síðan skáldaða fyrirsætutengiliði til að kúga konurnar til að koma aftur.

Hann sýndi engin svipbrigði þegar hann var sakfelldur fyrir ofbeldið en hann á margra áratuga fangelsisdóm yfir höfði sér.

Hann bar vitni fyrir dómi og hélt því fram að konurnar hefðu sjálfviljugar stundað kynlíf með honum. Hann játaði að hafa falið sönnunargögn þegar hann komst að því að búið var að gefa út handtökuskipun á hendur honum.

Hann sagðist hafa hent smokkapakka og eytt gögnum af fartölvu sinni og minniskorti því þar hafi verið myndir af honum að stunda kynlíf með konunum.

Hann sagðist aldrei hafa upplýst yfirmenn sína um að hann ætti húðflúrstofurnar.