Það er djúpt í mannlegu eðli okkar að telja að ekkert taki okkur sjálfum fram og að nútímatækni geti ekki gert betur en við. Nærtækt dæmi er uppþvottavélin en hún kom fram á sjónarsviðið um miðja nítjándu öld. En nú, rúmlega einni og hálfri öld síðar, þvo mörg okkar enn diska og glös upp í höndum eða skolum af þeim og skrúbbum jafnvel lítillega áður en sett er í vélina.

En þetta eigum við ekki að gera. Uppþvottavélar nútímans eru hraðvirkari og þrífa betur en við getum gert sjálf. Þess utan er umhverfisvænna að nota þær en að vaska upp í höndum. Það er því eiginlega bara kominn tími til að láta vélarnar alfarið um uppvaskið.

Í umfjöllun Science Alert um málið kemur fram að enn sé sú mýta lífsseig að það skili hreinna leirtaui og sé betra fyrir umhverfið að þvo upp í höndum, sérstaklega ef ekki er notað meira en ein vaskfylli af vatni í hvert sinn. Rannsóknir hafa hinsvegar sýnt að svo er ekki lengur. Uppþvottavélar noti lítið rafmagn og vatn. Fram kemur að ef vaska á sama magn og kemst í hefðbundna uppþvottavél upp í höndum án þess að nota meira vatn megi vatn ekki renna í meira en tvær mínútur úr krananum.