Óhætt er að segja að frásögn konunnar, Rebeccu Haro, hafi sett samfélagið í uppnám en nú grunar lögreglu að sitt hvað standist ekki skoðun í frásögn móðurinnar.
Rebecca lýsti því að hún hafi verið á bílastæði við verslunina rétt fyrir klukkan átta á fimmtudagskvöld þar sem hún var að skipta á syni sínum, Emmanuel, í bílnum.
Lýsti Rebecca því að karlmaður sem hún kannaðist ekki við hafi ráðist að henni og kýlt hana með þeim afleiðingum að hún rotaðist. Heldur hún því fram að Emmanuel hafi verið á bak og burt þegar hún raknaði við sér.
Rebecca segir að hún hafi heyrt karlmann fyrir aftan hana segja „hola” áður en hún var lamin í andlitið. Hún hafi síðan rankað við sér nokkru síðar.
Í frétt USA Today kemur fram að lögregla hafi rætt við fjölda fólks vegna málsins, þar á meðal foreldra Emmanuel, Jake og Rebeccu. „Í þessum viðtölum var Rebecca spurð út í ósamræmi í frásögn sinni og neitaði hún í kjölfarið að halda viðtalinu áfram,” segir í tilkynningu frá skrifstofu sýslumanns sem USA Today vitnar til.
Lögregla hefur meðal annars notast við hunda í leitinni að Emmanuel og þá hefur lögregla grafið upp hluta af lóðinni við heimili fjölskyldunnar. Enn sem komið er hefur Emmanuel ekki fundist.
Móðir Rebeccu segir í samtali við KTLA að hún efist ekki um að frásögn dóttur hennar sé rétt. Hún myndi aldrei gera syni sínum mein og hann sé bæði stolt hennar og yndi.
