Hjúkrunarfræðingur í Queensland, Ástralíu, má ekki sinna sjúklingum næstu fjögur árin samkvæmt ákvörðun úrskurðarnefndar í mars – en úrskurðurinn var fyrst birtur í síðustu viku. DailyMail greinir frá því að hér sé um að ræða viðurlög við ógnvekjandi fyrirætlunum hjúkrunarfræðingsins Karenjeet Kaur Warburton sem ætlaði að ná sér niður á fyrrverandi kærasta sínum með því að láta skera undan honum.

Warburton átti í ástarsambandi við rannsóknarlögreglumanninn Don McKey á árunum 2020-2021. Hjúkrunarfræðingurinn var ósátt við sambandsslitin svo hún reyndi að fá einn af sjúklingum sínum til að skera undan sínum fyrrverandi. Það var sjúklingurinn Andrew Bown sem hún fékk til verksins. Hún lét hann hafa myndir af fyrrverandi kærasta sínum, myndir af heimili hans og loks afhenti hún honum um 250 þúsund krónur og lofaði frekari greiðslu við verklok.

Í úrskurðinum stendur að Warburton hafi sagt Bown að skera undan McKey, skera úr honum tunguna, brenna andlit hans með síru og að hryggbrjóta hann svo hann myndi lamast eða brjóta öll bein í líkama hans. Markmiðið var að McKey gæti hvorki gengið né talað aftur. Bowen þáði þetta boð og gerði ítrekaðar tilraunir til að ljúka verkinu. Í þeirri alvarlegustu kveikti hann í heimili McKey og olli þannig töluverðu eignatjóni.

Þetta fór þó allt út um þúfur þegar leynilögreglumaður setti sig í samband við hjúkrunarfræðinginn og fékk hana til að játa.

Warburton var handtekinn og fyrir dómi játaði hún tilraun til alvarlegrar líkamsrásar og var dæmd í fimm ára fangelsi, þar af 16 mánuði óskilorðsbundið. Dómari hafði þó ekkert um starfsréttindi hennar að segja og því fór málið líka fyrir úrskurðarnefndina en þar gekkst Warburton við því að hafa gerst brotleg í starfi með því að misnota trúnaðarsamband við sjúkling sinn með ofangreindum hætti.