Gleymdu öllu um dýr þvottaefni og mýkingarefni ef þú vilt fá handklæðin mjúk og loftkennd úr þvottavélinni en samt sem áður án þess að ógna heilsunni eða hafa slæm áhrif á umhverfið. Lausnin er hugsanlega í íþróttatöskunni þinni.

Ef þú átt tennisbolta, ósköp venjulegan tennisbolta, þá er hægt að nota hann til að bjarga handklæðunum og öðrum þvotti.

Ef þú setur tvo til fjóra hreina tennisbolta í þvottavélina eða þurrkarann, þá hafa þeir þau áhrif á þvottinn að trefjarnar mýkjast og efnið verður loftmeira. CHIP skýrir frá þessu.

Fram kemur að helst eigi að sleppa því að nota mýkingarefni því efnin í því myndi himnu ofan á trefjunum og fjarlægi rakadrægnina.

Sérfræðingar segja að sum efni í ákveðnum mýkingarefnum geti verið ofnæmisvaldandi og í versta falli krabbameinsvaldandi.

Það er hægt að nota tennisbolta á fleira en bara handklæði. Þeir gagnast vel þegar koddar, dúnúlpur og önnur efni með fyllingu eru þvegin. Þeir hjálpa til við að koma í veg fyrir að fyllingin safnist í klumpa.

Þeir bæta einnig loftflæðið, stytta þurrktímann og fækka krumpum á fatnaðinum.

Þú getur dregið úr þvottaefnisnotkuninni um helming með því að nota tennisbolta og afraksturinn verður betri.