Indversk flugmálayfirvöld hafa gagnrýnt Air India fyrir „endurtekin og alvarleg brot“ á reglum um vinnutíma flugmanna og hafa fyrirskipað fyrirtækinu að víkja þremur háttsettum starfsmönnum úr starfi.

The Independent skýrir frá þessu og segir að flugmálastjórn hafi á föstudaginn skipað Air India, sem er í eigu Tata Group, að víkja varaforseta, forstjóra skipulagningar á störfum flugáhafna og skipulagsstjóra þeirra deildar úr starfi.

Flugmálastjórn segir að Air India hafi ítrekað brotið alvarlega gegn reglum um vinnutíma flugáhafna og varðandi réttindi flugmanna og hvíldartíma. Segir flugmálastjórnin að það sé sérstakt áhyggjuefni að háttsettir starfsmenn hafi ekki verið látnir sæta ábyrgð vegna þessara brota.