Í 67 ár starfaði Sylvia Bloom sem ritari hjá sömu lögmannsstofunni í New York. Það var árið 1947 sem hún hóf störf hjá Cleary Gottlieb Steen & Hamilton lögmannsstofunni á Wall Street. Hún var einn fyrsti starfsmaður lögmannsstofunnar. Bloom fór á eftirlaun 2014 þegar hún var 96 ára og lést árið 2016. En í öll þessi ár sagði hún engum frá ótrúlegu leyndarmáli sínu.

Samkvæmt frétt The New York Times gerði Bloom gott betur en að verða sér úti um ritaralaun á starfsferli sínum. Segja má að hún hafi átt fyrir salti í grautinn og gott betur en það. Ekki komst upp um leyndarmál hennar fyrr en að henni látinni.

Þegar bú hennar var gert upp kom í ljós að hún lét eftir sig rúmlega 9 milljónir dollara en það svarar til rúmlega 1,1 milljarðs íslenskra króna. Hún arfleiddi fjölskyldu og vini að töluverðum fjárhæðum en um 6 milljónir dollara lét hún renna til góðgerðarstofnunarinnar The Henry Street Settlement en þetta er stærsta peningagjöf sem stofnunin hefur fengið í þau 125 ár sem hún hefur verið starfrækt. Stofnunin aðstoðar þá sem minna mega sín við nám.

En leyndardómurinn á bak við þennan mikla auð Bloom var að þegar hún hóf störf sem ritari þá sá hún um nánast allt sem þurfti að gera fyrir eigendur lögmannsstofunnar. Þar á meðal fjárfestingar þeirra. Þeir ákváðu hvaða hlutabréf þeir vildu kaupa og létu Bloom sjá um kaupin. Hún gerði eins og þeir og fjárfesti í sömu hlutabréfum en þó fyrir lægri upphæðir enda á lágum ritaralaunum. Þetta vatt upp á sig og á endanum var hún í viðskiptum við 11 banka og 3 hlutabréfasjóði.

Bloom var barnlaus og eiginmaður hennar, Raymond Margolies, lést 2002. The New York Times segir að mjög líklega hafi Margolies aldrei fengið að vita um þetta „hliðarstarf“ eiginkonunnar.