Suðurkóreski herinn sagði nýlega að nágrannarnir í Norður-Kóreu væru að taka hluta af hátölurum, sem þeir hafa haft við landamæri ríkjanna, niður. Þetta sagði í tilkynningu frá hernum nokkrum dögum eftir að Suður-Kórea tilkynnti að hátalararnir sunnan megin yrðu teknir niður og hætt að útvarpa áróðri til norðurs.

CNN segir að norðanmenn séu þessu nú ekki alveg sammála því Kim Yo Jong, systir Kim Jong-un einræðisherra, hafi sagt fyrir helgi að Norður-Kórea ætli ekki að fjarlægja hátalarana sín megin. Hún tók einnig fram að einræðisstjórnin hafi ekki í hyggju að hefja samningaviðræður við Bandaríkin og Suður-Kóreu.

Fyrr í vikunni sagði Lee Jae Myung, forseti Suður-Kóreu, að hann vonist til að löndin geti smám saman hafið viðræður á nýjan leik.