Andrés prins hefur verið mikill höfuðverkur fyrir bresku konungsfjölskylduna á síðustu árum og þá sérstaklega fyrir Karl konung. En nú bendir ýmislegt til að konungurinn sé alveg við það að fá sig fullsaddan af bróður sínum sem virðist vera erfiður viðureignar og dýr í rekstri.

The Times segir að nú séu tveir valkostir í boði fyrir prinsinn: Að flytja eða borga.

Fyrir utan að hafa kallað skömm yfir konungsfjölskylduna vegna náins vinskapar hans við barnaníðinginn Jeffrey Epstein hefur Andrés verið ansi erfiður viðureignar.

Hann hætti að sinna verkefnum á vegum konungsfjölskyldunnar 2020 vegna Epstein-málsins. En hann krafðist þess samt sem áður að fá að búa áfram í hinni stóru Royal Lodge höll við Windsor kastala.

Karl konungur hefur lengi reynt að telja Andrés á að flytja úr höllinni, sem er risastór, þar eru 30 svefnherbergi, og er hún metin á sem nemur um 5 milljörðum íslenskra króna.

Konungurinn telur að það sé meira viðeigandi að Andrés búi í Frogmore Cottage sem var standsett í tengslum við brúðkaup Harry prins en húsið hefur staðið autt síðan Harry og Meghan fluttu til Bandaríkjanna.

Andrés, sem var eitt sinn númer tvö í erfðaröðinni að krúnunni, hefur þvertekið fyrir að flytja en nú bendir flest til að Karl konungur hafi sett honum úrslitakosti.

The Times segir að Karl hafi sagt honum að annað hvort greiði hann sjálfur kostnaðinn við búsetuna í Royal Lodge en að öðrum kosti flytji hann í „meira viðeigandi húsnæði“.

Ef hann velur fyrri kostinn, verður það honum dýrt. Lögreglan telur hann ekki lengur þurfa vernd hennar og því sér einkafyrirtæki um öryggisgæsluna við heimili hans. Hún kostar sem nemur 520 milljónum íslenskra króna á ári og greiðir Karl konungur þann kostnað. En ef Andrés velur að búa áfram í höllinni verður hann sjálfur að greiða þessa upphæð.

Ef hann flytur í Frogmore Cottage þarf hann ekki að greiða fyrir öryggisgæslu því húsið er svo nærri Windsor að það fellur undir öryggisgæsluna þar.

Andrés er sagður þurfa að taka ákvörðun í málinu fyrir vetrarbyrjun.