fbpx
Föstudagur 21.júní 2024
Pressan

Konan taldi sig hafa unnið milljónir í spilakassa en þá komu öryggisverðirnir

Pressan
Þriðjudaginn 21. maí 2024 20:30

Ekki missa af Helstu tíðindum dagsins í pósthólfið þitt

Lesa nánar

Kona ein hefur höfðað mál gegn Bally‘s Casino-spilavítinu í Atlantic City þar sem hún krefst þess að fá 2,56 milljónir Bandaríkjadala greiddar.

Konan, sem er 72 ára, hafði eytt nokkur hundruð dollurum í spilakassa í tækjasalnum þegar hann gaf merki þess efnis, með ljósum og háværum hljóðum, að hún hefði unnið tvöfaldan gullpott, upphæð sem nemur 355 milljónum króna.

Ekki leið á löngu þar til öryggisverðir komu aðvífandi og tjáðu konunni að kassinn væri bilaður og hún hefði í raun og veru ekki unnið neitt. Starfsmaður spilavítisins opnaði kassann, ýtti á einhverja takka áður en hann bauð konunni 350 dollara í bætur fyrir óþægindin.

Í frétt New York Post kemur fram að konan hafi neitað þessu og krafist þess að fá alla upphæðina greidda. Það gekk ekki og hefur konan því höfðað mál.

„Þeir opnuðu kassann áður en nokkur hafði tækifæri til að skoða hann – og eyddu mögulega einhverjum sönnunargögnum,“ segir lögmaður konunnar. Hann hefur kallað eftir því að framleiðandi kassans verði fenginn til að leggja mat á það hvort einhver bilun hafi átt sér stað. Þá hefur hann kallað eftir því að fá upptökur úr öryggismyndavélum spilavítisins.

Það sem gefur konunni von í málinu er að dómafordæmi í sambærilegu máli frá árinu 2000 er til staðar. Þá fór maður sem taldi sig hafa unnið 1,3 milljónir dollara í spilakassa í mál við spilavíti sem neitaði að borga honum. Dómur féll manninum í vil.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt