Schiavone hefur setið í fangelsi í 26 ár en ekki hefur komið fram hvað veldur því að hann sé nú reiðubúinn til að aðstoða yfirvöld í baráttunni við mafíuna. Ekki er vitað hverju hann ætlar að skýra frá en yfirvöld telja það mjög stóran áfanga að hann sé nú reiðubúinn til samstarfs.
Talið er að hann viti hvernig mafían felur illa fengna fjármuni. Ef það er rétt og hann skýrir frá því, þá gæti það orðið þungt högg fyrir ítölsku mafíuna.
Schiavone gengur einnig undir nafninu „Sandokan“ en það er nafn vinsællar ítalskrar ævintýrapersónu, sjóræningja. Er hann sagður líkjast þessum sjóræningja nokkuð mikið.
TV2 segir að hann sé óumdeildur leiðtogi Casalesi-klansins og einn af valdamestu mönnunum Camorra-samtakanna sem eru ein af þremur stærstu samtökunum innan ítölsku mafíunnar.
Schiavone var dæmdur í ævilangt fangelsi 1988 fyrir ýmis afbrot, þar á meðal fjölda morða.
Flókin fyrirtækjanet
Vitað er að mafían sýslar með mikið magn reiðufjár en það er ekki það sem athygli yfirvalda beinist að nú. Talið er að stóru upphæðirnar sé að finna í flóknum fyrirtækjanetum og leynireikningum innanlands og utan þar sem, að minnsta kosti á yfirborðinu, löghlýðnir lögmenn, embættismenn, stjórnmálamenn, kaupsýslufólk og jafnvel lögreglumenn aðstoða mafíuna.
Ef lögreglunni tekst að varpa ljósi á uppbyggingu þessara fyrirtækja og þá sem koma við sögu er ljóst að margir munu missa embætti sín, vinnu og enda í fangelsi. Þetta gæti orðið mjög þungt högg fyrir mafíuna.
