Á síðasta ári hélt skógareyðing áfram af fullum krafti í regnskógum heimsins og var skóglendi á stærð við 10 fótboltavelli eytt á hverri mínútu. Í heildina var 37.000 ferkílómetrum skóglendis eytt í regnskógum heimsins á síðasta ári en það svarar til stærðar Sviss. Jákvæðu fréttirnar eru að mjög dró úr skógareyðingu í brasilíska og kólumbíska hluta Amazonregnskógarins.

The Guardian skýrir frá þessu og segir þetta koma fram í tölum frá the World Resources Institute (WRI) og University of Maryland í Bandaríkjunum.

Aðalástæðan fyrir skógareyðingunni er að landið er tekið undir landbúnað af ýmsu tagi.

Í Brasilíu dróst skógareyðing saman um 39% og í Kólumbíu um 49%. Ástæðan er stefna forseta ríkjanna í umhverfismálum. Á móti kemur að skógareyðing jókst í Bólivíu, Laos, Níkaragva og fleiri ríkjum.

Einnig var mikil skógareyðing í Kanada á síðasta ári en það var af völdum elda en ekki beinnar ásóknar manna í landið.