Það er eitt sem við getum treyst á að verði alltaf í lífi okkar og það er þvottakarfan. Flíkurnar þarf að þvo og á mismunandi prógrammi, brjóta saman og ganga frá, dag eftir dag eftir dag.
Eins og þeir vita sem sinna þessu nauðsynlega verki í venjulegu heimilishaldi þá eru þvottaleiðbeiningar á hverri flík og sumir klóra sér í hausnum yfir hvað þessi merki öll þýða. Hin bandaríska Jennifer, sem er af Z kynslóðinni (e. Gen Z), sem eru einstaklingar fæddir á árunum 1997 til 2012, er þó ekki í neinum vandræðum með það.
Í myndbandi sem hún deildi á TikTok má sjá hana fá hjálp frá iPhone símanum sínum. Í myndbandinu má sjá hana taka mynd á símann af þvottamerki sem hún veit ekki hvað þýðir, svæpa og fá útskýringar. Síminn bauð henni einnig upp á að fá upplýsingar um þvottaþjónustu á netinu.
„Þú ert 23 ára þegar þú lærir að myndavélin á símanum getur sagt þér hvernig á að þvo fötin þín almennilega.“
@jennnyyyyjayyyy #laundryhack #cameraroll ♬ original sound – Jennifer
Myndbandið hefur fengið nærri tvö milljón áhorfa og yfir 67 þúsund hafa líkað við myndbandið. Flestir eru ánægðir og játa að vita ekki hvað mörg þvottamerkjanna þýða.
Aðrir voru hins vegar kjaftstopp yfir að fólk gæti ekki lagt þessi merki á minnið.
„Við erum dauðadæmd,“ skrifaði einn, meðan annar skrifaði: „Z kynslóðin þarf símana sína fyrir allt, þau gætu ekki lifað án hans.“
„Merkin skýra sig sjálf,“ skrifaði einn sem sér líklega alfarið um þvottinn heima.
Á netinu má finna leiðbeiningar um þvottamerkin meðal annars í bæklingi sem Elko gaf út árið 2020, upplagt að prenta út, innramma og hengja upp í þvottahúsinu.